நான் இராசிபுரம் வட்டம், மங்களாபுரம், இந்திரா நகரில் சொந்த வீட்டில் வசித்து வருகிறேன். எனது வீட்டின் உட்பகுதியில் உள்ள மின்கம்பம் மற்றும் தாழ்வழுத்த மின் பாதையினை மாற்றக் கோரி சுமார் 20 ஆண்டுகளுக்கும் மேலாக சம்மந்தப்பட்ட துறையினரிடமும், மேலும் இதுதொடர்பாக உயர் அதிகாரிகளிடமும் பலமுறை மனு அளித்து வந்தேன். ஆனால் என் வீட்டின் உட்பகுதியில் உள்ள மின் கம்பத்தினை அகற்றவில்லை. இதனைத் தொடர்ந்து நாமக்கல் மாவட்ட ஆட்சித்தலைவர் அவர்கள் மக்கள் குறைகளை விரைவில் தீர்வு காணும் பொருட்டு, எந்த அலுவலகத்திற்கும் நேரில் சென்று புகார் அளிக்காமல், இருந்த இடத்திலிருந்து தங்களது கோரிக்கைகள் / புகார்களை தெரிவிக்க தீர்வு (Theervu) என்ற இணைய வழி சேவை வசதி குறித்து அறிந்தேன்.

எனது வீட்டிலுள்ள மின்கம்பத்தை அகற்ற கோரி தீர்வு (Theervu) என்ற இணையவழியில் கடந்த 08.07.2026 ஆம் தேதி புகார் அளித்தேன். இந்த கோரிக்கையின் பேரில், எனது வீட்டினுள் உள்ள மின் கம்பத்தை அகற்ற சம்மந்தப்பட்ட துறையினருக்கு உடனடியாக மாவட்ட ஆட்சித்தலைவர் அவர்கள் உத்தரவிட்டார். மாவட்ட ஆட்சித்தலைவரின் உத்தரவின்படி கடந்த 17.07.2026 அன்று எனது வீட்டினுள் இருந்த மின் கம்பம் அகற்றப்பட்டது. சுமார் 20 ஆண்டுகளுக்கும் மேலாக நடவடிக்கை எடுக்காமல் இருந்த இந்த பிரச்சினையினை "தீர்வு" என்ற இணையவழியில் விண்ணப்பித்த 10 நாட்களுக்குள் தீர்வு காணப்பட்டது. எனது கோரிக்கையினை நிறைவேற்றியதற்காக மாண்புமிகு தமிழ்நாடு முதலமைச்சர் அவர்களுக்கும், மாவட்ட ஆட்சித்தலைவர் அவர்களுக்கும் எனது மனமார்ந்த நன்றியினை தெரிவித்துக் கொள்கிறேன் என தெரிவித்தார்.